La guerre de Troie
Mythes
Troie
Enée
Impius Aeneas
Ecrivez-nous
Recherchez
Copyright
Aspirateurs
Impius Aeneas
Benoît de Sainte-Maure - Le Roman de Troie, vers 24471 sqq, passim
 Paix entre les Grecs et les Troyens |
|
[v. 24471] Entre Antenor e Eneas, Anchisés e Polidamas ont pris conseil et esgardé, qui que desplace o viegne a gré, rendront Heleine son seignor : « N'i remaindra aveir n'ator, drap de seie ne or molu, que tot ne sei o li rendu ; n'iert mes por li plus de mal fet ». N'en farai ore autre plet, Mes venu sunt au rei Priant. La cors josta pleniere e grant, dient au rei « des or les creie, prenge conseil e si por veie comment de males aventures, qui tant par sunt pesmes e dures, traira a chef, qu'en voudra fere, car tuit li deu lor sunt contrere. Tuit conoissent e veient bien que de son prou ne volent rien, monstré li ont des qu'a la fin, e bien li pramist Apollin e tuit li profeticement e li saive devinement ». [v. 24669] Li reis Prianz ne siet que face, l'eve li cort aval la face. Cels crient e dote, si a dreit, car bien conoist e aperceit qu'il n'avra plus aide d'els ; engignos sunt, ce set, e fels. En une chanbre peinte a flor, o le vaslet son fiz menor parole e dit li reis Priant qu'il a poor e dote grant de cesz vassauz, que nel traissent, qu'ensi fetement l'envaissent de pes fere. Ne dote mie qui il n'i pensent felonie [...] « Bien sai, s'il ne sunt devanci, que nos serons par el trahi, je lou que lor trenchons les chiés. Por quant, si est a fere griés, mes de dous mals deit hom eslire quels est li mieldre e quels li pire. Ce est granz mals qu'om les ocie : noeus sereit s'esteit traie ceste citez ne nos par elz ». [v. 24731] Eneas, Anthenor e Polidamas e Anchises e cuens Dolon e li saives Eucalegon hastivement pristrent conseil, qu'en crieme erent e en esveil, cum fetement s'en vengereient e coment il s'en desfendereient. Que mes en fareie lonc plet ? Ensi cum l'estoire retret, plevi se sunt e afié qu'il traiereient la cité o ce que lor possessions e lur aveirs e lur meisons e lur amiz e lur parent eussent pes e quitement. Ce sera parlé as Grezeis ; ice jurerent sor lor leis. Aprés ont esgardé coment sereit empris cel parlement. [v. 24826] Angoissous duel meine Priant : poor a grant d'estre engigniez. E cil s'est tost apareillez : sos le murs monte e sor l'eschive ; en sa main tint un rain d'olive, pes monstre as Grieus e seurtance. E cil li unt feit demonstrance que il s'en isse toz seurs. « E puis que nos avrons leisir d'aler en l'ost e de venir si porrons doncs apareillier, fere, parler e porchacier cum ceste ovre seit achevee, que nos avons ci porparlee ». Ensi se resunt departiz, mes bien se sunt entr'els garniz, que qu'avenist ne que que non, car molt redotent traison. [v. 24901] Ceste parole fu greee ; sempres n'i ot plus demoree ne pris ne terme ne respit. I ont Agamennon eslit, lo rei de Crete e Ulixés, e si refu Diomedés. Ensi cum reconte Ditis sor cesz quatre fu l'esgart mis. En un paveillon riche et bel dont l'aigle est d'or e le pomel e li pesson d'ivoire chier, s'en entrerent por conseiller. Longues paroles i unt fetes, que bien serunt aillors retretes. Porparlee unt la traison ensi cum nos la vos diron : que Eneas ait quitement sa rente e ce qu'a lui apent e sun aveir sans perdre rien. E se li aseurent bien que de l'avoir comunal pris, quant partiz sereit e devis, avreit tiel don e tiel partie que toz les jors mes de sa vie sereit d'aveir enmanantiz, riches, comblez e repleniz. A Anthenor offrent e dient e bien li jurent e afient que si aveir seront gardé e que cil avront quitée qu'il voudra e qui li tendront e qui rien li aparteindront. Demi le regne au rei Priant tant cum il tient e il est grant, donent Polidamas son fiz. De ce se sunt entrepleviz. Ensi aferment lor afere del bien celer e del bien tere ; si cum la letre aprés nos dit, que une trive e un respit seit prise entr'els e cels dedenz tant qu'enterree seit lor genz. [v. 25882] Prianz li reis a ce se test ne respont rien ne mot ne sone. Mes Eneas l'en areisone e Antenor, qui li funt fere ; otreié lor fu sans contrere. Ensi departirent le jor. Molt s'esjoient li traitor, e le poeples xomunement cuident de fin certeinement que, par lur diz e par lur feiz, seit la citez de Troie en pez. [v. 26085] Tote la nuit dura ensi, tant que li jors lur esclarci. As forz meisons as treitors ont enveiez bons gardeors, qu'eles ne seient alumees, ne peceiees ne robees. [v. 26132] Quant li jors prist a esclairier, s'unt Grieu asilli Ylion. N'i troverent desfension. Antenor, li cuiverz Judas, e Anchisés e Eneas les unt conduiz e menez. Molt sunt cruels e desfaez. Coment le puet lor cuers sofrir ? a duel lor puisse revertir ! tant damage, tante dolor sunt avenu por traitor ! [v. 26163] La reine veit Eneas : « Cuiverz, fet ele, Satanas, vils e hontos e reneiez, cum osastes or porpenser, ne cum le poez endurer, que l'om ici, vos oilz veiant, a detrenchié lo rei Priant ? Il ne pert mie a vostre face que il vos en peist ne desplace. Par vos est or Troie eissillee, nos mort, e la haute lignee qui de Dardan iert estreite ; hai ! cuiverz ! quel l'avez faite ! a honte en puissez vos aller ! » Sor le marbre l'estut pasmer. Quant el repot aveir s'aleine si li dit a molt grant peine : « Cuiverz, traitres reneiez, quant de mei ne vos prent pitiez ne de Troie qu'ensi decline, gardez sevaus ceste meschine que anemis n'en seit seisiz. Ja mar de mei avreiz merciz ! s'il ocirre ne me voleient, s'ai je dous mains, que m'ocirreient ». Adoncs rechiet pasmee a quaz. Eneas prent entre ses braz Polixenein tote par morte. Isnelement o sei l'emporte, qu'ele n'en siet mot ne nel sent, ne de li n'ist aspirement. [v. 26407] La parole fu eissaucee e demandee e encerchee, tant qu'Antenor en fu blasmez e molt eigrement acusez. Agamennon l'en fist l'apel tiel qui n'esteit ne bon ne bel. Cil en parole o Eneas, si li dist qu'il ne loot pas, s'il la sievent, qu'el fust celee, quar molt sereit chier comparee. Molt li prie que veir l'en die, quar trop par a fet grant folie des Grieus faire vers eus marrir [...] Mais Antenor, le vieil, le chien, l'a quise tant e nuit e jor qu'es chambres d'une vieille tor la trueve raposte e muciee : par les dous braz l'a hors sachiee. Al rei Agamennon la rent, qui en a fait don e present al fill Achillés, al cuivert. |
© Francesco Chiappinelli pour tout ce module.