La guerre de Troie
Mythes
Troie
Vaincus
Polyxène
Ecrivez-nous
Recherchez
Copyright
Aspirateurs
Polyxène chez Benoit de Sainte-Maure, Le Roman de Troie
| La reine veit Eneas : « Cuiverz, fet ele, Satanas, Vils e hontos e reneiez, Cum osastes or porpenser, Ne cum le poez endurer, Que l'om ici, vos oilz veiant, A detrenchié lo rei Priant ? Il ne pert mie a vostre face Que il vos en peist ne desplace. Par vos est or Troie eissillee, Nos mort, e la haute lignee Qui de Dardan iert estreite ; Hai ! cuiverz ! quel l'avez faite ! A honte en puissez vos aller ! » Sor le marbre l'estut pasmer. Quant el repot aveir s'aleine Si li dit a molt grant peine : « Cuiverz, traitres reneiez, Quant de mei ne vos prent pitiez Ne de Troie qu'ensi decline, Gardez sevaus ceste meschine Que anemis n'en seit seisiz. Ja mar de mei avreiz merciz ! S'il ocirre ne me voleient, S'ai je dous mains, que m'ocirreient ». Adoncs rechiet pasmee a quaz. Eneas prent entre ses braz Polixenein tote par morte. Isnelement o sei l'emporte, Qu'ele n'en siet mot ne nel sent, Ne de li n'ist aspirement (vv.26163-26194). La parole fu eissaucee E demandee e encerchee, Tant qu'Antenor en fu blasmez E molt eigrement acusez. Agamennon l'en fist l'apel Tiel qui n'esteit ne bon ne bel. Cil en parole o Eneas, Si li dist qu'il ne loot pas, S'il la sievent, qu'el fust celee, Quar molt sereit chier comparee. Molt li prie que veir l'en die, Quar trop par a fet grant folie Des Grieus faire vers eus marrir. Mais Antenor, le vieil, le chien, L'a quise tant e nuit e jor Qu'es chambres d'une vieille tor La trueve raposte e muciee : Par les dous braz l'a hors sachiee. Al rei Agamennon la rent, Qui en a fait don e present Al fill Achillés, al cuivert (vv. 26407-26429). |
Merci au professeur Francesco Chiappinelli, auteur de l'Impius Aeneas, de nous avoir fourni ce texte.