La guerre de Troie

Hygin - Fabula 95 - Ulixes

Agamemnon et Menelaus Atrei filii cum ad Trojam oppugnandam conjuratos duces ducerent, in insulam Ithacam ad Ulixem Laertis filium venerunt, cui erat responsum, si ad Trojam isset, post vicesimum annum solum sociis perditis egentem domum rediturum. Itaque cum sciret ad se oratores venturos, insaniam simulans pileum sumpsit et equum cum bove junxit ad aratrum. Quem Palamedes ut vidit, sensit simulare atque Telemachum filium ejus cunis sublatum aratro ei subjecit et ait «Simulatione deposita inter conjuratos veni». Tunc Ulixes fidem dedit se venturum ; ex eo Palamedi infestus fuit.